مكتبة الشاعر أزهري محمد علي

[طارق عبد القادر]

مكتبة الشاعر أزهري محمد علي

بحبك بحر



مـــعـــاى
وغشيتك أسلم عليك
أتكّل قصادك
هموم الحراز
أطمّن طيوف الخريف الوشيك
أبشر دواخلك بوعد الرزاز
مودر ملامحك
غبيتك
لقيتك
بتلفظ شوارعك بيوتك
تصادر خطاك وتكاجر مشيك
تغالط حواسك ملامحك
وتحرد عيونك مقاطع وشيك
سألتك خبارك ؟!
مسُوكر لسانك
! وصمتك يشفق
خبارك ! بتغرب شموسك
زمان الشموس البتشرق

تضيع الملاحه التعطن وجيهك
ومّنك تدفق
! خبارك غريبة
أقلب دواخلك
أكوس الحبيبة اللى عنك بتفرق
بتفرق حبيبتى البتلبس فصول الخصوبة
بتضحك أغانى
وتدفق عذوبة وبتنزل مطر
عشقتك لأنك حبيبتى
وبحبك بحر
عشقتك لأنك خواتم الحقيقة
وطريق الوصول لأنك بداية الخليقة واساس القبول
أحيّى الغيوم البتفطم ذبولك
ترضع سهولك ، مواسم الهطول
واحيّي المدائن البتفتح حدودا
وتمنح عيونك جواز الدخول
يزيد خيرك
ولا طابت بلاك عيشة
مقسمة إنت فى غيرك
مقسمة فيك ما فيشه
ومخيم ليلك العسعس
لا برقن بروق صحوك
لا صبحك رضى اتنفس
يحندك فى العطش غيمك
تمطري إنت فى الخاطر
وتنفضي من دواخلى العس
بديت أتسامى للآخر
رميت توب البيات الرث
قويت إتيقنت روحي
وسقط منى الكلام الغث
أنا الدّاخرك بصيرة وشوف
يا بقعة ضو
فى عتمة قلبى المحفوف
ومسربل فى بالشتا والليل
والخوف
فارغة ومليان بيك
وضيقه عليك البشره
أنا غيبتك بينى وكنتك
زمَََََََََََلتك فى الخاطر بُشرى
مزَقت ستار الجلد الهش
وطلعتى من الجسد القشرة
تاوقت
لقيتك فينى النفس الكاملة
تتوقى اليابسة
والنهر فى إيدك صلصال
يتسارق ضوَك خافت
متهافت نحوك أجرى
مهرول راكض
سابقت خُطاى وحدقتك
غيمة .. وضل .. وبُحيره
ضاريتك بينى وضاريتك
من الحزن القابض
نفسى وروحى واقف عارض
ستفت عيونك بالمطرة
وقرحتك ضد الزمن الراكض
وحدقتك حبيبتى
البتشبه فصول الخصوبه
تضحك أغانى وتدفق عذوبة
وبتنزل مطر
عشقتك لأنك حبيبتى
وبحبك بحر .

المصدر: شبكة سوداني ون - من قسم: أزهري محمد علي

---

l;jfm hgahuv H.ivd lpl] ugd

 

 

 

[طارق عبد القادر]

يا مشرع الحلم الفسيح


يا مشرع الحلم الفسيح
أنا بينى مابينك جزر
تترامى .. والموج اللّديح
القدرة والزاد الشحيح
كملتو .. ما كِمل الصبر
نتلاقى فى الزمن المريح
ميعادنا فى وش الفجر
يا مشرع الحلم الفسيح

يا مشرع الحلم الفسيح
يا بعض منى .. وفينى ساكن
أنا أصلى منك ومشتهيك
و بيناتنا ليل الغربة ... داكِنْ
هبّة هبوبك..
أفتح شبابيك المساكن
وسـِّع دروبك ..
ولـِّع مصابيح الأماكن
يا مشرع الحلم الفسيح


يا مشرع الحلم الفسيح
يومنا النـّهِـبْ .. أسلِبنا خوفنا
كبـِّرنا قدرك .. مرتين
وطـِّول قدر كتفك .. كتوفنا
يا رغبة الرعد البيسكن ..
بين غناوينا وحروفنا
ضوِّى الدساكر والضفاف
عبِّى الحناجر بالهتاف
سدِّد مسامات الرِّعاف
نوِّر مغاراتنا وكهوفنا


يا مشرع الحلم الفسيح
أنا وإنت .. والمطر الفصيح
حانطوِّع الزمن القبيح
نأخد بعض .. شكل السما
حدِّثنى دايماً .. كلما
تنشف على البر الضفادع
يهجر الضو المواضع
وتسقط من الكف الأصابع
حدثني دايماً كلما
تحرد مراسيك السفن
تسكن مرافيك الزعامات .. الدُمى
حدثنى لو تاهت خطانا ..
على الدروب المبهمة

أو ربما..
تهدم آلات الشوارع ..
وترجمْ العُزّى الصواقِع
حدثنى لو مطرك همى ..
حدثنى لو صادف الكى المواجع
وضلك على الساحل رمى
حدثنى لو مطرك همى
علمنا دايماً كلما
نبذر على أرضك شهيد
يطلع شمس ..
يبهر بأنوارو السما

يا مشرع الحلم الفسيح

 

 

 

[طارق عبد القادر]

الطشاش

غيب إحساس الرضى
ومسَح الروح بالغباش
وانا ما نعيت
طيب معشرك
ولا أقمت عليك عزا
إشتهيت أفرد ضفيرتك للمطر
واحقن وريدك بالدُعاش
واكتفيت
أفضل أريدك إندهاش
أو ألوذ بي نفسي عنك
! يامدهشة
أنا وين أفوت منك أمش؟
بشفق عليك
من حسن ظنك
بالملايكة المارقه من باب الشمس
يا جابدة من تحتى الأرض
وقابضة فى نفسى العرش
يا نابضة من عطش الجسد للروح
مجلوبة إنت ومستباحه
كل المواعيد الزنيمه
كانت مباحة
ومطلقة
كل البراحات الحميمة
موصوده دونك ومغلقه
مسجونه فيك
إنتظارات السحاب
والإحتمالات المريحه ومقلقه

محلوبه من دمك عصارة العفه
فيك
لا فُضّ فيك
يا صومعة إملاقى والعشق المحال
دقت مسامير الفجيعه
على العُضام الحيه واللحم الحلال
بتمرقى من وجع المحجَه
وتندسى بين جرحى العُضال
وما انبله حلقك بالإجابات السؤال
فعلام جدواه .. السؤال
علام جدواه السؤال
وفارسك مدجج بالدعاوى الخايبه
والوعد الحنوط
رددتى فى سرك جلالات الهزيمة
وتليت على سرى التشهد والقنوت
مطموسة فيك كل الصحايح
بالفضايح
الواقفه شاهد والبيوت
وتعارضه ما بين الضحك والعبره
شوكة حوت
فعلام جدواه السؤال
يا باحثه عن كل السواقط
من نهاراتنا المهمة
ونابتة من خيبة أملنا
مع الليالى المدلهمة
يا متعبة
ومحقونة بى خدر الأمانى
المستجمة
أنا ما دلقتك للشوارع البارده
ولا البيوت المترفه
لو راودك عن نفسك الماجن الدّعى
وهدّ عزمك بالوعود الزايفه
ما تنسى إنك كنت وافقه
على المسامير الصقر
مجليه بى عرق الشفا
لا شاكيه من ذل العوز
لا باكية من وجع الجفا
وأنا ما دلقتك للشوارع البارده
ولا البيوت المترفه
يا واقفه مشروخه وأبيه يا نحملك شرف القبيله
ونغرمك سيف القضيه أو نبعثـك حُـرة ونـبيّه
لو قد ثوبك من قفا وأنا ما دلقتك .. ما دلقتك

 

 

 

[طارق عبد القادر]

الخروج من بيت النمل

تمى غناك الخمجان
وزودى إيقاع الرقص
ومحل ما تمدى إيدك
أنزلى أمطار
وريحى أعصاب الطقس
مدستر فيك الزول الجواى
ومنك أول زول
نازل دستوروا معاى
أول زول صالحته لوجه الأرض
كان منك
آخر زول ناهر خوفى
وعارف معنى الرفض
كان منك
يا متوهطة حلم الكل

ومعلنة إنك ضد البعض
أنا راغب أستخلص عذبك
من بحر الشك المالح
أسقيك حليب الروح
أكسيك من عُري الزمن الفاضح
يا وحم العشق المحموم
ومخاض الجرح الفادح
أنا ليه قدامك .. دون
وعدتك نمشى نخصب حلم المويه
بوعد الرمل
رجعنا نكلم حلم المويه
برفض الرمل
وقعدنا بنقطع فى المويه وفى الرمل
سرقوك منى ودسوك
فى بيت النمل
طراك الصهيل حس الصرير فى بابى
أنا عازمك مقيل ومخصمك ما تابى
خليهو العويل كان يسترك جلبابى
يا جدية العُزاز ما بلحقك نشابى
فى الوادى الفسيح مرقت براها كلابى
فزت فى القنيص صدّن بلاها كلابى
أدتنى السلام سلمتها السبابى
حنت للرحيل رحلت مع الجلابى
وحّيدا الكتيل كتل المنخلع للدابى
ويا خيه .. كل البراحات وسوسه
الهاويه خلفك والبحر
وقدمك طنين الهلوسه
محمدك ساساق دروب الهم
محمدك .. طول المدى الشاسع
بين الإيدين والفم
ويا إنتى العشم مزبوح
أدسك فى خلايا الدم
تمرقى بى خراج الروح
حمل كاذب رعد أبكم
حبل متروك على القارب
واشوفك فى الحصار باهته
نتف غضب العُصار ريشك
حتل فيك الكلام الرخو
نقز فى دمى درويشك
واظنك إنتى
غشاك الشعور بالزهو
سقط سهواً غناك الكان
بكلب جلدة الغفوة
وينفذ من مسام الصحو
لكنك بتطلعى من حوافر الخوف
تطلعى من حلم مهووس
ومن فجة سفر طول
يسربك الحنين فينى
تعلنى عن زمن آتى
تعلنى عن وطن أجمل
ولكنك بتطلعى .

 

 

 

[طارق عبد القادر]

وضاحة

الـصباح الـباهى لونك
وضّـاحه يافجر المشارق
غـابة الأبـنوس عيونك
يَـابْنَيّه مـن خُبز iلفنادق
شـيدتي في جواىْصوامع للفرح
وفـتحتِ في دُنياي مسارح
للمرح
وبـقـيـتـي لــــيْ
سِــكّــه وعــيـون
لا قِـــدرْتَ أطـولـكْ
شــــان أجــيــكْ
لا قِـدرْتَ من غيرِكْ أكونْ
وانـا بـيك مالينى الكلام
حرّكت بيك عصب السكونْ
جَـلبتَ لـيكْ الغيم رحط
طـرّزتَ ليكْ النيل زفاف
حَــرَقْــت ليك
الــشــوق بــخـور
وفــرشــتَ لــيـك
الــريــد لِــحَـافْ

لا الـسِكَّه بـيكِ بِـتِنْتهي
ولا مـعاك ملّيت الطواف
يـا ريتني لو أقْدَر أكونِك
الـصباح الـباهى لونك
يَـابْنَيّه مـن خُبز الفنادقْ
غـابة الأبـنوس عيونك
وضّـــــاحــــه
لــو طــال ا لطريق
بـيناتْنا واتـرامي الـمدى
وصنَّت مَسَامْعِكْ من iiنِداي
شِـرْبَتْ فـيافيِك ا لصدى
مـا تـحنِْى هامات النخيل
مـا تـرمي دَمَعاتالندى
مـا تْشنِّفى الزمن الجميل
دا الـعُمرِ يـا دابـو اْبتدا
! والعُمْرِ إيه حيكون iiبدونِك
وضّـاحهَ يا فجر المشارِق
الـصباح الـباهى لـونِك
يـا بـنيه من خبز الفنادقْ
غـابة الأبـنوس عيونك

 

 

 

[طارق عبد القادر]

أبداكي من وين ؟؟؟؟

أبداكى من وين .. ؟

وفينى منك

لسة حاجات من مخاوف ومن شجن



أبداكى من وين .. وظنى إنك

فكرة إعلان الحياة

وإنتهاءات العوارض والمحن

نفسى ألقاكى وأكون

أنا كلى من بعضك

أو .. بعضى من كلك بدن

وداير أبقاكى وأوحد دورة الدم

المقسمة بينى .. بينك .. والسحن



أبداكى منى .. ولاّ منِّك

أبتديكى محل .. محل

من ياتو منفذ أدخلك

وكل المنافذ فيكى سدّاها النحل

من ياتو شارع أوصلك

وكل الدروب معطونة لى آخر الوحل

.. أستبيح كل الحواجز .. وأدخلك

من كلامك بدخلك

من بين مسامك بدخلك

من أى قاسم مشترك

وشبهة تشابه .. ادخلك

ونتلاقى نهرين من تسامى .. وإشتها

وأبداكى من حيث أنتهت عندك خواتم الإنتها

أبداكى .. وأخلع خيام عمرى المضى

وألقاكى مبسوطة اليدين

مفتوحة أبواب الرضا

أبداكى من لحظة أنستِكْ نار

وأخدت من قبسك .. هُدى

وأنا ضُمـّة زاهد

فى الدروب الما بتجيك

.. ولا بترجِّع ليا من تالاك صدى

أبداكى من وين ؟

 

 

 

[طارق عبد القادر]

حضنك البستان



مرقت من نهرك

جرف اخضر



بقامة حضنك البستان



بقامة يشتهيك الطل



وتحتشد الحديقه هديل



تنفض المدينة رهان



جنون الاعتصام



في بت تفسح ضحكتا الطاعمه



تستّف ما يشاء الدل



مسامات الازقه ضحك



يسلم ضحكتا الدخان

!!!!!


جنون

نفخ فيها الاله روحو



مرق احساسا من طين الحما المسنون

!

!


فعمّ يتسائلون
عن الوعد اليقين

اذا انتبذت حفيدة الطين



اقاصي الجرح



دارين من حنين



وغنّت لي فرح وهاج



وحلّت زي حلول الروح



جسد في جبة الحلاج



وهاج وحما الخليقه عليها



امشاج ابتلت امشاج



ما تاكت الباب البجيب الريح



ولا واربت نفاج



ومحتاج لي ضفتين من شوق



اذا الهدّام بلغ قيفك



ادخلي ما تسع ايديك



وامرقي ما يسع كفيك



انا اتسلبط في لونك



عشان اسرقك



من شمس تفر الضو



علي ابعد نفق في الروح



الوان من مزيج طيفك



منو السماك



ضرة الموية



ونديدة النار



يوم حتحتك فينا الرعاف



منو العلّمك



نسج التباريح في العصب



وانتي بتجلبي الغلا



في سنينا العجاف



بخاف تهجرك موية الرهاب



وفي السكة بستلفك وهم



وانا باتجاهك محتشد



بالرغبه واحساس اللغم

!!


انا متهم

اني البحبك وحدك

!!


انا متهم

اني البحبك للابد



فكرة وبساسق فيك

من ذرة بخار المويه لي قاع اللحد



البنيّات حاحن النوم



من عيوني وروحن



البنيات المن حلاتن عشرقن



ركّن علي غصني بيقوقن



نقدن قندول غناي



ونقّطن شهد ولبن

!


وفاتن مشن

فاتن مسافه يلمحنك ويمّحن



فاتن مسافه يكبجن



جماح الرغبه والحاح الجسد



فاتن مسافه يلفحنّك



من رمض او يمنحنك ضل



رتّبي مدخلات العشق



فراش بين الرحيق والفل



بناديلك حبيبة القلب



ينادولك حبيبة الكل



جرف اخضر



بقامة حضنك البستان



بقامة يشتهيك الطل



وتحتشد الحديقه هديل



تنفض المدينه رهان



جنون الاعتصام في بت



تفسّح ضحكتا الطاعمه



تستّف ما يشاء الدل



مسامات الازقه ضحك



نفخ فيها الاله روحو



مرق احساسا



من طين الحما المسنون

!!!!


جنون

 

 

 

[طارق عبد القادر]

سلامات يا زول يا رائع !!!

مدخل اول
لمتين متيم شطر النيل
متوقي اليابسه



متوكي الغنيه عصا موسي



بتهش من غيم الالفه الشارد



مهدود القدره وفترانه



حردان الضل البارد



بتوجّل لي يوسف في البير



يطلع من بطن البير المارد




:





مدخل ثاني

فات الكان بدينا احساس بالالفه



وكان راوينا



فات الباكي جرحنا وناسي جروحو



ولاّفي ورانا مدينه مدينه



فات الصاحي ونحن نغط



في النومه السابعه



طالق حسو ولا حسينا



حتحت فينا غناه الطاعم



وفات قنعان من خيرا فينا

^^

**



سلامات يازول يارائع



سلامات عوافي



سلامات يا خلاصة الخير الفي الناس



وترياق الزمن المتعافي



سلامات يازول يارائع



سلامات عوافي



محاصر فيك



بسال عن سكه تطلع منك



او سكه تودي عليك



بسال عن مخرج منك وليك



زي نهر بينبع ومالاقي مصب



بتمدد عشقك من اقصي ضواحي الروح



لي اقصي نواحي القلب



يتكثف بسعة اطلاق الرب



وانا كنت بفلي القلب بسيرتك



سمّيتك حلاب الغيم



من ضرع الجدب



وظنيتك مارست الفعل السري



وحفّظت فحولة النيل



ايام الخصب



ولمحتك انت بتمشي



وترقص في حمامك



علي حمة ايقاع الحرب



وتكلكل جلد الكلمه الحافه



لحبيبه بتفتح مجري الغنا في الدم



وتفّلس بيبان القلب



فيا بنوت الشارع الطاعم



قومن كب



قومن للما قصر في غناكن ضمه



ولا اتلوم بوراكن تب



لو تبقي السكه الماشه طشاش



ماتبقي السكه الجيه ضهب



وسلامات يازول يارائع






البارح عصفورتك



ركت في البال



رقصت



وادت عصفور الريد شبال



وطارة من قولة كر



ما الزول النهر العصفوره



بحرّض في كلاب الحر



لابسني وداخل في اللحم الحي



راصد كل البسال عن حالي



حرّش طلّي عليّ



ونتفّ زغب الخاطره التخطر علي بالي



ومنع العصفوره تحوم



استجوب كل الناس البجو في النوم



ما تقوم



يازول يارائع ومهموم



يا مضيع ضي عيني وراك



واقف



يامستف رئة الدنيا شهيق



ومشحتف روح الخرطوم

كيف حال يا ابوي



كيف حال يا خال



وتعال



اتفضل علي باحة بيتنا الطيب


ماعون الاطفال

ضمّد جراحاتك تعال



من ضلاماتك تعال



من حافة البرزخ تعال



من شرفة الملكوت - تعال



ادّينا هينين من صبر



السكه ابعد من مشيك



والجرح اعمق من حدود الاحتمال



السابله والاطفال هناك



قدّامك المشوار طويل



والريح وراك



كل البيوت



اتشرّفت لي طلعتك



القرقراب والقهقهة



مين سمي ترحالك غياب



والغيبة بتزيدك بها



لو يرتق الحزن المصاب



كان بعدك الموت انتهي



يا اقصي حالات الحضور المشتهي



يامنتهي



تعال قرّحنا بي دهشة غناك الحي



وحّي من جرحك الدامي



وفتر حيلك



وحّي من ضلك الرامي



وحمل شيلك



تموت متل الشدر واقف



تموت واقف علي حيلك



فيا حليلك






يا حليلك ..بنستناك



علي صهوة جياد الريح



بنستناك



في الزمن اللديح القيح



علي باب الحلم في غناك



بنستناك



رحيلك شلهت الدنيا



ورتب العالم البهناك



بنستناك



وانا تاني وراك شن لاحق



دهستني في بعدك



حدود الخوف



الداخله عليّ بالساحق



اديني القدرة التمنحني



بحجمك سعة الشوف



لو اقدر اطل من شاهق



لو اقدر الّوح لعيونك



تلمحني



وانا ضعفي امامك فاضحني



سامحني



ما قدرت اطولك



سامحني






شفتك من وجع طالع



علي برزخ ملتقي النيلين



كنت هناك وحيدك



وكل الناس اتنين اتنين



براك واقف



في حد السيف



براك الما وقف بين بين



تغازل حلمك الفارع



فتح بابين علي الملكوت



تسلّم خواتم عمرك اليانع



تسلّم علي حضرة جلال الموت



وتفتح في الارض نفاج



اذا امتلا الفراغ بالصوت



فيا باطن الاديم افتح



براحات الحنين مشرع



وانده لي مدن شاخت



انده لاطلال القري الراحت



بيوت في بيوت



تمرق من شبر مسرح



مدن فاضله



وعالم باتساع الحلم



بقامه يشتهي التابوت



فما لفظ البحر يونس



ولا انسدة شهية الحوت



ويازول ياريع



تمشي بالحسره وتموت؟



سلامات يازول يارائع

 

 

 

[طارق عبد القادر]

جرحت ليه خاطر الحبية ؟

جرحت ليه خاطر الحبيبه



:الحبيبه

المشطت عصب التضاريس



وهدّت علي كل الخرايط ..والفراغات



مدهونه



بي لونه ارصفة المحطات



واقده من ريقا الفوانيس



جرحت ليه خاطر الحبيبه



دي السكه ابعد من حدود الاحتمال



والجرح اعمق من بكا الليل والنويح



ويوم استفزّت قدرتك



قيمة المسافات



عرفت انك قليل حيله وفصيح



ستّفت عمرك في حقايب الرجعه



للسفر القديم



مرقت



تشهّل غربتك



وبي توبا تستر عورة الزمن اللئيم



وتكسي في الشدر اللحا



ماهي الحبيبة الطولت ضل الضحي



وقعدت تفلي السكه من وجع الضريسه



وعضّة الجوع الزنيم



ماهي دي الحبيبه



الشحتفت روحي



ومعطنه في ينابيع الالق



الشاربه من فجر الشروق



وماخده من لون الشفق

ماهي دي الحبيبه



الداخله من بين مسامات العرق



رقراق



وطالعه زي قمر الدجي



وسايقاني في كل الدروب



ساساق



رامياني حد القريفه



وقالياني زي قهوة بجا



ما هي دي الحبيبه



يومي المشيت مجبور



علي السكه المريبه



ادتني احساسا الرطّب



وشهرت ضحكتا العزبه ومشت



كانت رؤاها بتحتشد



زي نار



بتسجن روحا



في عود الثقاب



وتعلن مهرجانات الحريق



لو كشت الواطه ولقيتا



ما كنتا ضليت الطريق



ودفقت مويتي علي الرهاب



مشيت ورا الشدر اليمامه



دي الرتبت خدر الحنين



في الروح وعبت



دوار النشوه...في جسد المنامه



وانا كنت مفتون بي تداعي اليابسه



في عرس التساب



مشدود علي حبل الصعود اسفل



مشلهت بالايادي الفوق



مشلهت والبدن منحل



لفحت من الارض طرقهوالشاطي



في ذروة المد



انكسر



وانا بعزمك علي مويه



عذبه



وضل وريف



لو هم سقط



من طاقه



في حلم الحبيبه






جرحت ليه خاطر الحبيبه

 

 

 

[طارق عبد القادر]

إختــــيار

يا مفتونه بصدق الوعد




يا مسكونه بحلم الغد



انا خيرتك بين الشهد



وبين البّن الفطره



وانتي اخترتي سواد البّن



وطعم القهوة البكره



انا خيرتك



وانتي اخترتي



هل قدرتي الرقعه الواقعه



بين الليله واحلام بكره



وكيف حتملي الحته الواسعه



بين الواقع وبين الفكره؟



وين حتلقي المويه الناقعه



يوم نصطاد في المويه العكره



انا بديك موانع الصاقعه



انتي اديني الموت والستره






انا خيرتك



وانتي اخترتي



واقف جنبك لو احترتي



بايع نفسي وشاريكي



دافنك بيني مواريكي



واصلك مني اتاريكي



لو تعرفي يوم شاهدتك



من روحي بتدخلي في نفسي





باريتك خلسه وغازلتك
سمعتك وما سامع همسي



كضبت عيوني وصدقتك

غيبت احساسك في حسي

:


وناديتك

يا مطمنه في قلبي الخوف



بتونسي روحي وبتحجي



بترجعّي لعيوني الشوف



اتلوّمي دايما واحتجي



مشتاقلك جدا وملهوف



واقف في دربك مترجي



وحجيجك بي قلبي يطوف



جواي بتعمري وبتحجي



وانا جيتك



مكسور الخاطر





جيتك مجروح
ولقيتك مفضوح الصمت



الفي عيونك بالبوح



ممحوق الزمن البين ضحكك والنوح



سكنتك كل الانفاس الحيه



وسلمتك مفتاح الروح



لو تعرفي يوم هدهتك



في ليل بستجدي الغمضه



اقدامك كانت في الصحرا



وايديك في البحر بتتوضا



كم حائط ينهض بيناتنا



كم حائط من بينا اتهدّ



قاومت الرهبة وناديتك






والصوت من عندك ما ردّ
طاوعت الرغبه وغنيتك



غنيت للمراءه الورد